This piece is written in my creole, the native tongue of the people of Antigua and Barbuda
You see dung dey?
Dung by white hill by de drop off,
Me does see it dung dey,
A likkle likkle light,
Movin’ back and forth,
Nuttn’ but a jackolantan,
Stalking the gully side for something.
So them say…
…So sh so ee mus’ go
An’ look who live juss over the valley?
But Sista Sandy and she three Sister them.
Dem say that them dark,
The three bigges obeah woman in all Antigua,
Dem meck the one them in Potter feel shame,
Me stay far,
Me never see dem ah do nuttn out of the way,
But so them say…
…So ah so ee mus’ go
But dat anna the worst part ma dear,
Me hear the big daughter fu she,
The Dany? Yeah she.
The one feel she too upity,
Say how she have degree,
Like that mek she better than we,
Run way go a ‘Merika,
Wid the ‘Merika man she Mumma tie gee she,
And de tie na work and he leff she,
Mek she haffu run back ya,
Tail between she foot, like dog to ee vomit,
Come to think of it me na see she since she come,
She mussa shame bad.
So dem say…
…So ah so ee mus’ go.
You girl why you na hush?
With your foolishness talk,
The light dung dey is Randy,
Smoking he blunt,
Watering he marijuana stalks,
And Miss Sandy?
Is she you do so?
When you min sick she was the only women’s council member dey you do’
As for she daughter, I know is grudge you juss grudge,
The poor girl lost she man,
To an Afghanistan Bomb.
Wha mek you na tell me ’bout you jail bird son?
The one them ketch wid the 6 pounds of coke, ah de big one?
Or the four gran’pickney you tell he na tek?
Wid de gyal for Donna-Sue,
A good Doctor she woulda meck?
And where oh where is your husband,
My dear Maudelyn,
He still shaking up with that young girl over Glanville?
Not dat you ever tell me when he get up and left,
Or me meself did see,
But that is what they said,
And so it must be.